Ардчилалын өмнөх социалист нийгэмд төр засаг нь иргэдийнхээ боловсрол, соёл, урлагийн мэдрэмжийг дээшлүүлэх тал дээр анхаарч нэгдмэл бодлого явуулж байсан. Хэдийгээр уг үйл ажиллагаа нь хэт их цензуртэй нэг талыг баримталсан байсан ч, албан тушаал хөрөнгө мөнгөнөөс үл хамааран нийт иргэдэд соёл урлагийг тэгш хүргэн нийгмийг бухимдлаас ангижруулж, хүмүүст амьдралдаа итгэх итгэлийг өгч байсан юм.

1990 оноос бий болсон Ардчилсан өөрчлөлтийн үед төр засаг, улс төр эдийн засгийн хямралд орж нийгэмд чигэлсэн тогтвортой бодлого алдагдан Монгол улсын иргэд гадны соёл, эдийн засгийн нөлөөнд хяналтгүйгээр хүчтэй автсаны улмаас өнөөгийн нийгэмд бухимдал, үл ойлголцох байдал бий болоод байна.

Дэлхийн өндөр хөгжилтэй улс орнуудын хөгжилд хүрсэн түүхийг судлаж байхад хямарсан нийгмээ хүчтэй соёлын бодлогоор нэгтгэж, иргэдийнхээ оюуны хөгжлийн өөрчлөлтөөр амжилтанд хүрч байсан байна.

Даяршлалын өнөө үед өндөр хөгжилтэй орнууд боловсрол, соёлын нэгдсэн бодлогыг хамтран явуулж, хөгжиж буй орнуудыг өөрийн эдийн засаг болон соёлын нөлөөнд барьж байна.

Монгол улсын хөгжлийн төвшинг эдийн засгаас гадна иргэдийн боловсрол соёлын төвшингөөр тодорхойлох юм. Нийгмийг соёлжуулах үүргийг зөвхөн төр засагт даатгах бус төрийн бус байгууллага болон хувийн хэвшлийн байгууллага хамтран хариуцаж өнөөгийн нийгмийн дунд бий болоод байгаа бухимдал, үл ойлголцох байдлыг арилгах хэрэгтэй байна.

Клуб 21 нь 2001 оноос эхлэн үйл ажиллагаа явуулсан бөгөөд хорин нэгдүгээр зуунд Монгол улсаа хөгжүүлэхийн тулд нэгдсэн соёл урлагийн салбарын залуус юм.

2010 онд бидний хийх гэж буй гол ажлын нэг нь www.club21.mn веб сайт юм.

Энэхүү www.club21.mn веб сайтийн үйл ажиллагаа нь ашгийн бус байх бөгөөд нийгмийг соён гэгээрүүлэх, иргэдийн чөлөөт цагийг зөв боловсон өнгөрөөх, үндэсний болон дэлхийн соёл урлагийг нийгэмд таниулах соёлын хөтөч болох зорилготой байна.

Соёл урлаг, шоу арга хэмжээ, үзэсгэлэн – үзвэр үйлчилгээ, соёлын өдөрлөг, уулзалтуудын талаарх мэдээлэл танилцуулга сурвалжлагуудыг цаг тухайд нь вэб сайт дээрээ мэдээлж, бүртгүүлсэн гишүүддээ өдөр бүр и-мэйлээр Монголын болон дэлхийн соёл урлагийн талаар товч танилцуулга илгээж байх юм.

Соёлын хөтөч (culture guide) болох www.club21.mn нь телевиз болон хэвлэл мэдээллийн хэрэгслээр соёл урлагийн арга хэмжээний хуваарь тоймыг давхар мэдээлж, нийгмийн чөлөөт цагаа өнгөрөөж байгаа хэлбэрийг өргөжүүлж дэлхийн төвшинд хүргэхийн төлөө ажиллах хэтийн төлөвтэй байна.

Олон нийтийг хамарсан нийгэмд эерэг нөлөө үзүүлэх манай үйл ажиллагааг дэмжиж хамтран ажиллахыг хүсэж байна.

Хүндэтгэсэн                  Клуб 21-ийн Амай