rednecks (17)

2014 оны 10 сарын 4

Монгол бадарчин 4-р аян. 76.5 дахь төр

АНУ-ын Итака хот

“Монгол Бадарчин” дөрөв дүгээр аяндаа, Хойд болон Төв Америкийг бололцоогоороо судалж, санхүү хүрэх юм бол Өмнөд Америкаар дайраад буцах төлөвлөгөөтэй гарав. Канад улсаас эхэлж, улмаар урд зүг явна гэж бодсон ч тийм ч амар бүтдэггүй визэд нь зарцуулах цаг хугацаа, зардал хэтэрхий үнэтэй тусаад байсан тул АНУ-ын Нью Йорк хотоос гараад Итака хотоор дайрч, Чикагод дүүтэйгээ уулзаад, тэгээд өмнө зүг хөдлөхөөр төлөвлөв. Канадыг хамгийн сүүлд нь…

Өглөө гар утас дуудаж байгаа мэт санагдлаа. Байнга утсаа сольдог болохоор шинэ утасныхаа дууг таньсангүй. Арай гэж босон утсаа автал – Золоо! Яасан бэ?  Чамайг хүлээгээд байна шүү дээ! Байгаа газар чинь яваад очьё… гэж Монголоор яаруулж байгаа сонсогдлоо.

Би хаа байна аа? гэдэг нөгөө асуултаа өөрөөсөө дахин асуув.mongol badarchin books taivshir

Яалт ч үгүй гадаадад байна гэдгээ эргэн тойрноо хараад мэдлээ.

Итака хотод танилцсан Болд ах намайг баруун зүг Пенсильван муж хүртэл хүргэж өгье гэхээр нь цуг явбал сонирхолтой байж магад, бас газар дөхье гэж өчигдөр ярилцсанаа сая л нэг саналаа.

Хувцсаа шүүрээд гадаа гарахад, ах удалгүй ирэв.

Тохирсон цагтаа сэрээгүй, утсаа шууд аваагүй гэж хүүгийнхээ хажууд намайг загнасангүй.

Гэхдээ л ууртай байв.

Нүүр гараа угааж, цайгаа ч ууж амжилгүй холын замдаа гарсан нь анхных биш билээ.

Хөдөлж эхлэхэд, зөөлөн бороо шивэрч, аян замыг минь дахин ивээж байна даа гэж бодлоо.

rednecks (1)

Хүмүүстэй уулзах цагаасаа хоцорч байсан ах америкийн замаар хурдаа бага зэрэг хэтрүүлэн давхиж байгаад, мужийн цагдаагийн машинд саатуулагдлаа. Маш эелдэг яриа өрнүүлж, найрч, буруугаа ухаарснаа тус албан хаагчид тайлбарлахад, – За болгоомжтой яваарай, хурдаа битгий хэтрүүлээрэй гээд зуун ногооны торгуульгүй, биднийг явууллаа.

rednecks (2)

Ой мод, тал хээр, нуур, гол горхи, жижиг хот суурингаар хүрээлэгдсэн хурдны замаар гурван цаг гаруй давхиж, Пенсильван мужийн “Аллегени” гэх ойн дархан цаазат газрын хаяанд ирлээ.

rd (2)

Бат ах биднийг тосч, төв замаас гаран, модон дундах шороон замаар явсаар, хоорондоо хол зайтай зуслангийн байшингуудтай ойн гүнд хүрэв.

Зуны модон байрны гадаа арваад  хүн цугласан байсан тул Монгол дээлээ гуталтайгаа өмсөөд буулаа.

rednecks (6)

Гэрийн эздийн нэг нь ирж бидэнтэй танилцаад, үндэснийхээ хувцсаа өмссөн надад  – Чи санаа зоволтгүй шүү, энд Рэднэк (redneck)-ууд цугласан байгаа, ийм хүмүүсийн талаар сонсож байсан уу? гэж асуув.

Хуучинсаг үзэлтэй, том оврын жийп машин унадаг, мал аж ахуй, газар тариалан, хүчний хар ажил эрхэлдэг, байнга буу зэвсэгтэй явж, ан гөрөөнд  дуртай, харууд, латинууд ер нь л гаднынхныг үздэггүй, хараалын үгний баялаг ихтэй, хотоос хол, хөдөө амьдардаг цагаан арьст Америк хүмүүсийг “Реднэк” буюу “улаан хүзүүт” (нар салхинд ажилладгаас хүзүү нь улайсан гэсэн утгатай) гэж нэрлэдгийг сонсож байсан ч, дошин дээр нь уулзах завшаан тохиосонд ихэд баяртай байв.

Рэднэк байтугай дайн дажин, гэмт хэргээрээ дэлхийн эхэнд жагсдаг улс орнуудаар ганцаар яваад ирснийг минь тэрээр мэдээгүй байгаа болохоор ингэж хэлж байна даа гэж бодоод –Яалаа гэж дээ, Харин Та нар Монголчууд ирлээ гэж нээх айцгааж хэрэггүй шүү, Mongols r coming with peace (Монголчууд эв найрамдал өвөрлөж ирлээ) гэж шоглоомоор хариулахад, тэрээр миний англи хэл болон хошин яриагаар, надад санаа зоволгүйг мэдэрч, өөрийн хүн байна гэж шууд ойлгов.

Бат ахын найзууд болох Баруун Европоос дүрвэж ирсэн, Кристийн шашинт цагаачдын үр сад бололтой, АНУ-ын иргэд, цайвар арьстай хүмүүс жилд нэгээс хоёр удаа энд цуглан, буугаар бай буудаж, шар айраг хүссэнээрээ хүртэж, эрчүүдийн эзгүй хээрийн жаргалыг эдэлж, хамт цагийг хөгжилтэй өнгөрөөдөг болохыг ойлголоо.

Хамгийн сүүлд Сьерра Леон дахь манай энхийг сахиулах анги дээр бас иргэний дайнтай газруудад л ийм их хэмжээний зэр зэвсэг харсан юм байна даа гэж эргэн тойронд буй олон төрлийн буу, сумуудыг хараад бодов.

Сайн байцгаана уу? Намайг Бат овогт Жамбалсүрэнгийн Золбаяр гэдэг, Амай гэж дуудаж болно. Би Монгол гэх үед сонин хувцасласан намайг хүн бүр анхааралтай харлаа.

Дал гарсан ахмад настнаас авахуулаад залуус цугласан энэ орчинд хоёр Монгол ахтайгаа байсан болохоор санаа амар байв. Бат ах эдгээр хүмүүсийн талаар товч тайлбарлаж, зарим нь улсын тусгай албанд ажилладаг тул зураг дарж, олон нийтийн хэрэгслээр цацаж болохгүйг анхаарууллаа.

Наадах чинь Монгол гутал уу?  гэж энэ бүс нутагт хүн бүрийн асуудаг асуултыг нэг нь бас асуулаа, – (Хэнд мэйд шүүз оф Монголз) Гараар хийсэн Монголчуудын гутал гэж хариулахад хээ угалзыг нь бүгд анхааралтай ажиглан зогслоо.

Ковбой гуталтай төстэй ч хамаагүй өргөн, хошуу нь өргөгдсөн байгааг –Монголчууд “Тэнгэр” шүтээнт хүмүүс, бид байгал дэлхийгээ хайрладаг болохоор дэлхий ээж дээрээ алхахдаа газрыг сэндийлэхгүй гээд гутлын хоншоор нь өргөөстэй байдаг юм гэж тайлбарлалаа.

Нэг нь – Ийм гуталтай болмоор байна, хаанаас авч болох уу?

Би -Монголоос л захиална даа.

Өөр нэг нь – Ямар үнэтэй байх вэ?

– 800 доллар орчим байх болов уу гэж нэг нь хариулахад, миний өмссөн зуун ногооны үнэтэй, гэрээр хийсэн Монгол гутал энэ хүмүүст ямар үнэтэй харагддагийг  сая нэг ойлголоо.

Хээ угалз, хийц, чанар, бас МОНГОЛынх…

gutal

Монголчуудад аюул болоод байгаа сигарет гэх бэлэн ороосон тамхинаас гарах гэж янз бүрээр үзэж байгаа би дүнсэн тамхиа цаасанд ороож эхлэх үед нэг нь – Чи юу ороож байгаа?  Би цагдаагийн хүн, хориотой юм байвал чамайг саатуулах хэрэг гарна шүү дээ? гэж тоглоомоор анхааруулав.

-Үгүй, табак ороож байна. Сигарет тамхинаас гарах гээ л хичээж байгаа нь энэ гэв.

Хүн бүр “НИЙЛЛЭГ” –ийн зарчмаар өөр өөрийн уух, идэх юмаа авчирсны дотор, ихэвчлэн согтууруулах чанар багатай, олныг ууж болдог америкийн үндэсний пиво байв.

Цэрэг цагдаагийн, ан гөрөөний, цуглуулгын зориулттай олон төрлийн зэр зэвсэг хараад, буудаж үзэх боломж олдож байгаад баяртай байсан ч, намайг анхааралтай ажиглаж байгаа шинэ танилууддаа түүнийгээ мэдэгдүүлсэнгүй.

-Буудаж үзэх үү? гэсэн асуулт надад иртэл хэдэн пиво ууж авлаа.

Багадаа хийн буудлагын газар байнга очиж, найзуудаа ялдаг байсан, том болоод өвөөтэйгөө хээр талд, бүрэнхий болсон хойгуур ангийн винтовоор лааз буудаж, ялагдаж байсан, Сьерра Леонед буу задалж угсарч байсан, Африкийн орнуудад төрөл бүрийн зэвсэгтэй хүмүүстэй олонтой учирч, буу хэрэглэж үзсэн дурсамжууд бас санаанд орлоо.

Нэг нь надад гар бууг дамжуулахдаа сум дүүрэн байгаа, бас хоолойд сум ороогүйг баталгаажуулж, задалж угсарч үзүүллээ. Гох руу нь буудах үедээ л хуруугаа хий, бусад үед гадуур байлга, хажуу тийш бүү савчуул, цоожийг нь буудах үедээ мултал, чанга атга, нөгөө гараараа доороос нь тос, тийрнэ шүү гэх анхааруулгуудыг тэрээр надад өгөв.

Ингээд боломжийг ашиглаж, АНУ-ын цагдаагийн хангамжид байдаг гар буугаар эхний туршилтаа хийлээ. Холгүй орших бай буудахад, дуу нь час хийгээд чих дүнхүүрүүлж орхив. Эргэн тойронд хүнгүй тулдаа санаа зовох зүйлгүй байв. Энэ бууны тэсрэлт болон эргэх ойлт үнэхээр хүчтэй юм санж. Кинон дээр полис гэх америк цагдаа нар хоёр гараараа энэ бууг барьдаг учрыг сая л ойлголоо.

rednecks (16)

Хамгийн таалагдсан нь М16 гэх цэргийн автомат бууны иргэний зориулттай хувилбар байв. Сумыг нэг нэгээр нь тасалж илгээдэг тус бууны зарим эд ангиудыг хуванцраар хийсэн нь хөнгөн болгожээ. Буудахад тийрэлт бага санагдав. Төрөл бүрийн буунуудаар буудаж байхдаа байг онохоосоо илүү, тус зэвсгийн миний биед нөлөөлж буй байдлыг мэдэрч, цээжлэхийг хичээв.

-Суманд санаа зовсны хэрэггүй, зөндөө байгаа, үнэ нь хямд болохоор бөөндөөд авсан юм гэж нэг нь хэлэв.

rednecks (15)

Хүн амынх нь 100 хүн тутамд 90 зэвсэг ноогддог, дэлхийн хамгийн зэвсэглэсэн улсад хууль сахиулах цагдаадаа сайн, дээд зэрэглэлийн хүчтэй зэвсэг бариулах нь аргагүй ажээ.

Дэлхийд байдаг гар зэвсгийн 30% нь энэ улсад байдаг гэхээр дотоодын цэрэг цагдаагийнхны ажил нь амаргүй бас аюултай гэдэг нь ойлгомжтой.

Монгол эр хүн бүр зайлшгүй сурсан байх эрдэм, буугаар буудах сонирхол их байсан ч гаднын хүмүүсийн хажууд улайран буудаад байхыг хүссэнгүй. Яаж ч байсан АНУ-ын иргэдийн хамгаалалтад байгаа зэвсгийг мэдэрч чадсан нь чухал байв.

rednecks (9)

Зуслангийнх байртай танилцахаар ороход лааз пивоны шил дүүрсэн хогийн сав, дараа буудах гэж бэлдсэн төрөл бүрийн зэр зэвсэг, хөргөгч дүүрэн шар айраг.

rednecks (10)

Гал тогоонд нь ороход олон хүнийг нэг дор хооллох зориулалттай аяга таваг, хоолны хэрэгслүүд, зочны өрөөнд нь гал түлдэг камин, буйдан, арав гаруй хүн унтаад амарч болох давхар ортой унтлагын өрөөтэй нэгэн модон байшин байв.

rednecks (12)

rednecks (11)

Ханаараа дүүрэн ан гөрөөний арьс, эвэр байх болов уу гэж бодтол алга.

Реднекуудтай хамт байхад хэцүү санагдсан ганц зүйл гэвэл, тэд нарын ярианы англи хэл.

Багадаа би англи хэл мэддэггүй байхдаа Реп, Хип Хоп хөгжимд дурлаж, үгийг нь ойлгохгүйгээр цээжлэн давтдаг байсан санаанд орно. Харин сүүлд англи хэл сайжирч, африк гаралтай америк хүмүүс юу дуулдгийг ойлгодог болсон цагаас хойш, энэ урсгалыг сонсохоо больж билээ.

Өөр тивээс боолчлогдон ирж, олон үеийн турш тэгш эрх, эрх чөлөөг хүсэн тэмцсэн, уам угсаа, удам судар үгүй, боловсрол нимгэн, ядуу амьдралтай, хар хүмүүс, үзэн ядалт, гэмт хэргээр дүүрэн ертөнцөд хүмүүжсэн болохоор уран бүтээлдээ өөрийн амьдралаа шүлэглэн илэрхийлж байсан нь Реп хөгжим болохыг хожим ойлгосон юм.

Ерөөлтэй магтаалтай дуу гэж бараг байхгүй.

Харин эдгээр цагаан арьст Америкчуудын ярианы хэвшмэл хэллэгэнд хараалын үгс гүн шингэсэн нь бас амьдардаг орчинтой нь холбоотой болов уу. Монголчуудын хувьд эрхэмлэн дээдэлдэг “Ээж” гэж үгийг Америкчуудын олонх нь муухай хараалын үгэндээ оруулж, тогтмол хэрэглэдэг нь хамгийн сонин зүйл шүү.

Айлд зочилсон болохоороо нэг шил Монгол водка, өөрийн “Дэлхийн Нэг Өдөр” номоо гэрийн эзэн, ахмад хүнд бэлэглэхэд, дэлхийн ийм олон улс орныг үзсэн зургуудаас минь хараад бүгд гайхаж орхив.

Хэдийгээр Америк паспорттай бол дэлхийгээр аялахад амар ч, АНУ-ын хүн амын 50-70 гаруй хувь нь гадаад паспортгүй, гадаадад жуулчлах нь харьцангуй бага юм билээ. Иргэд нь ихэвчлэн дотоодын аялал хийдэг ажээ.

redn (2)

Байрны өмнөх тавцан дээр таваг шиддэг төхөөрөмж суурилуулаад, нисэж буй тавгийг сум нь задардаг  ангийн буугаар ээлжлэн буудаж эхэллээ.  Реднэкууд хүүхдүүдээ багаас нь буутай харьцаж сургасан байдаг болохоор нисэж буй тавгуудыг бүгд төвөггүй онож байв.

Надад нэг нь буугаа өгч, хөөрч буй таваг онохыг харъя гэв. Буу хойшоо ойхдоо мөр мулталж магад тул арыг нь сайн тулгаж байгаад, нисэж буй тавгийг нь онох гэж хичээгээд чадсангүй.

Дадлага туршлага хэрэгтэй.

Галаа түр зогсоож, хоцорч ирсэн нэгийгээ тэд угтлаа. Машины зогсоол дээр бусдыг дагаж очтол сүүлд ирсэн залуу машиныхаа арыг сөхөхөд,  мөн л олон төрлийн урт богино буу зэвсэг авчирсан байв.

Сонирхолтой, содон буунуудыг нь угсарч, буудаж бас үзлээ.

Хүмүүс машиндаа ийм олон зэр зэвсэг авч явж болдог юм уу гэхэд, -зарим мужуудад болно, заримд нь хориглоно гэлээ.

Монгол Эр хүн бүр дайчин шүү дээ. Хүссэн хүсээгүй зэвсгийг мэддэг байх ҮҮРЭГТЭЙ.

rednecks (19)

-Бид, Рэднэкууд,  дэлхийн хамгийн том армийг бүрдүүлдэг. Гурван сая гаруй бидэн шиг бүрэн зэвсэглэсэн иргэн хүмүүс Америкийн газар нутгийг дайснаас хамгаалж байна гэж шинэ танилуудын нэг нь нүүр бардам хэлэх үед

-Хэрвээ энэ их зэр зэвсэг дотоодын зөрчилдөөнд хэрэглэгдвэл яах вэ гэж эргүүлэн асуухад бүгд дуугүй боллоо…

21 дүгээр зууны эхэн үед Дэлхийд тэргүүлж яваа энэ улсын эдийн засаг, Хубилай Хааны Юань гүрэн шиг цаасан мөнгөө хэвлэх бодлогоо алдсанаас болж хямарвал, гадаад харилцааны одоогийн байдал илүү хүндэрвэл, өөр өөр шашин шүтлэг, үүсэл гарал, үндэс угсаа, үзэл бодол, өнгө төрхтэй бөгөөд бүрэн зэвсэглэсэн иргэдтэй улсад байдал яах бол гэсэн зовнил хилийн элдэв маргаангүй, дотоодын зэвсгийн хяналт сайн, нэг Үндэстний улсын залуу надад өөрийн эрхгүй төрж байлаа.

Шар айрагны нь согтоох хувь нь бага тул америкчууд ихээр хэрэглэнэ. Цагаан хүмүүс сархад даах чадвар бусад гаралтангуудыг бодвол гайгүй тул хаа сайгүй зэвсэг хөглөрсөн энэ орчинд тэдэнтэй хамт ууж суухад, санаа зовох зүйл бага байв.

rednecks (13)

Бүрэнхий болж, гэрийн эзэн зочиддоо томоо сав дүүрэн хоол бэлдэж, хоолны өмнө халаалт ав гээд намайг вискигээр дайллаа.

rednecks (14)

Нэг нь – наадах чинь сонин биш ээ, үүнийг амс, өнөөдөр авчирсан юм гээд варений шилтэй нэгэн шингэн санал болгов. Дэлхийн улс үндэстнүүдийн бүх сархадуудыг хүртэж, тэдгээрийн тухай тэмдэглэл хөтөлж байгаа надад, гэртээ чанасан “Сайхан Тоор жимс” гэсэн бичигтэй энэ зүйл нь хаа сайгүй худалдан авч болох вискинээс илүү сонин байв.

– Юу вэ?

-Мүүншайн.

Энэ нэрийг сонсоод сонирхол ихээр төрөв.

Ямар амттай, үнэртэй, хир үйлчилгээтэй, тэгээд хамгийн гол нь маргааш ямар үр дагавартай.

Үүний тухай олон удаа сонсож байсан ч ууж үзээгүй юм. “Сарны туяа” гэж орчуулагдах эрдэнэ шиш, элсэн чихэр болон өөр өөр жимснээс гаргаж авч болдог,  тунгалаг өнгөтэй сархад.

АНУ-ын засгийн газар үүнээс болгоомжилдог шалтгаан нь архийг хортой спирттэй хольж хийдэг байсан түүхээс улбаатай юм. .

АНУ-д бүх төрлийн согтууруулах ундааг хориглож байсан 20-р зууны 30-40 өөд оны үед хүмүүс хортой архинд хордож, олноороо хараагаа алдаж байв.

Хувиараа архи нэрж зардаг хүмүүс хуулийн хариуцлагаас зугтаж, ойн гүнд нууц үйлдвэр босгож, сарны гэрлэн дор “мүүншайн”-аа нэрдэг байсан болохоор ийм нэртэй юм санж. Харин гэрээр нэрсэн архинаас татвар авах хуультай ч бага хэмжээгээр өөртөө хийсэн бол тэгээд л өнгөрдөг гэнэ.

Их хэмжээгээр, бас хортой үйлдвэрлэл явуулаагүй л бол энэ том улсын хуулийн байгууллага үүнийг нэг их том асуудал гэж үздэггүй байх.

“Nice peaches” гэсэн бичигтэй тагийг нь нээгээд, химийн хичээл дээр заасны дагуу гараараа хамарлуугаа сэвж үнэрийг нь үзлээ. Бага зэрэг гашуундуу хатуу сархад санагдав.

-Наадах чинь аюултай шүү гэж нэг нь анхааруулахад нөгөөх нь зүгээр ээ ууж үз гэж доргиов.

Би хувьдаа сархдыг дэмжигч эсвэл донтогч биш ч, Монгол эр хүн бүр янз бүрийн сархдыг шингээх чадвар, соёл, туршлагатай байх ёстой гэж үздэг.

Олон төрлийн газар нутгаар, өөр өөр хүмүүсийн дунд орж явахад юм бүхнийг үзэх хэрэг гардаг. Усыг нь уувал ёсыг нь дага гэдэг шүү дээ. Тиймээс энэ сархад ямар үйлчилгээтэй бол гэж сонирхлоо.

Манайд өөртөө хийж, ганцаар уух ёсон байдаггүй юм, хэн надтай хүртэх вэ? гэж уриалаад нэгэнтэй нь хамт тавь тавийг шууд явууллаа. Эдгээр хүмүүс өөрсдөө уудаг ундаа нь болохоор гайгүй байж таараа гэж бодлоо.

Монголд борлогдож байгаа дотоодын водка-г бодвол хамаагүй хүчтэй, бас өөрийн гэсэн амттай санагдлаа. 60-аас дээш хэмтэй болов уу. Африкийн Конгогийн ширэнгэн ойн босогчидтой хүртэж байсан сархадтай адил санагдаж, удалгүй дотор халж, бие хөнгөрөөд, нөлөөлөөд ирлээ.

Amai Mongol (123)

Буурцгаар хийсэн зутан шөлийг нь идэж дуустал өөр нэг хүн – хоёулаа нэг тогтооё гээд  дахиад тавь тавийг явууллаа. Удалгүй бас нэг нь намайг доргиож нэг нэг хүртлээ. Бусад нь тавь тавийг харин би зуун тавийг хүртчихлээ. Хүмүүсийн яриа холдож, бие маань агаарт байгаа мэт сэтгэл төрлөө. Нөгөө өрөөнд харагдсан зөөлөн буйдан руу бусдын анхаарлыг татахгүй явж, түр тухлан хэвтэх гэтэл нэг мэдэхэд унтсан байв.

Энэ сархад хүчтэй юм байна шүү! анхаараарай.

Сэрэхэд, бүгд гадаа,томоо том  түүдэг гал тойрон шар айргаа шимэн, өөр өөрийн сонин хачинаа бусадтайгаа хуваалцан ярилцаж байв. Янз бүрийн насны өөр өөр хөгжим, машин магадгүй бүсгүй сонирхдог хүмүүс яаж энд нийлсэн юм бол оо гэж бодон, галын хажууд суулаа.

Хаа явсан газраа бусдын анхааралд өртөж, аяллын тухай яриулдаг болохоор энэ удаа ч гэсэн хүмүүс миний номыг үзсэн болохоор асуултаар булж эхлэв. Дэлхийг тойрон үзсэн Монгол хүн гэдгээр биш, хүн төрөлхтний 7 тэрбум дотор цөөхөн хүний нэг болохоор сонин байсан нь мэдээж.

Өөрийн хувийн амьдралдаа бол, ярианы соёлыг баримталдаг хүмүүстэй нийлж байхыг илүүд үздэг боловч, аялж байхдаа усыг нь уугаад, ёсыг нь дагаж, таарсан хүн бүртэй сайн харилцаа тогтоох хэрэгтэй болдог юм.

Нутгийнхан, онцгүй утгатай үг хэллэгүүдийг яриан дундаа олноор хэрэглэж, түүнийг нь анзаарахгүй баймаар байсан ч, тархинд орчуулагдаад хэцүү байв.

Шинээр сонссон ганц хоёр хараалын үгний утгыг нь нутгийнхан орчуулж өглөө. Дотор муухай оргихоор, аймаар…

Аль болох ярианд нь оролцохгүй, тэнгэр өөд хөөрөх гал ширтээд сууж байтал, уух юмандаа согтсон нэг нь өмдөө шувтлаад хоёр метрийн өндөртэй гал руу шээж эхэллээ. Халуунд буцалсан шээсний уур хамрыг сэтэлж, би галын хажуугаас ухас хийн босож, юм хэлэлгүй дотогш орлоо.

Өдөр бүр өөр өөр үүсэл гарал, хэл соёл, ёс заншил, боловсрол, нийгмийн гарлын хүмүүстэй учирч, тэдгээрийн амьдрал сэтгэлгээг үзэж, харж явдаг миний хувьд саяны хүний үйлдэл гайхмаар, уурламаар байгаагүй ч, Монгол хүний хувьд, миний шүтдэг гал руу шээсэн явдалд дургүй хүрээд, буйдан дээр Төв Америк руу хэрхэн хүрэх тухайгаа ганцаар бодон хэвтэж байгаад нэг мэдэхэд унтсан байв.

Нөгөө “Сарны туяа” туссан хэвээр.

-Амай, амай гэж дуудах шиг болохлоор нүдээ нээтэл, нөгөө гал руу шээдэг залуу хажууд ирсэн, уучлалт хүсэн зогсож байв.

Монголчууд Та нарын хувьд гал ийм чухал болохыг би мэдээгүй юм, уучлаарай, хамт гадаа гаръя гэж хэлж буй реднэкийг хараад гайхлаа. Бүдүүлэг, харанхуй, зэрлэгдүү хүмүүс байдаг гэсэн ойлголт маань үгүй болж, -Зүгээрээ гээд араас нь гарлаа.

Байшин дээр нурж унах аюултай ойр хавийн том моднуудыг хөрөөдөн, түлж байсан сүрлэг том гал маань нэг л дулаан санагдахаа больж, урьсан хүмүүсийг хүндлээд хэсэг гал ширтэн сууж байгаад эргээд буйдан руугаа явлаа.

Нийллэгэнд олон оролцсон болохоор, хамгийн гайгүй байршилтай унтах газрыг хамгийн түрүүнд эзэлж, гүн нойрслоо.

АНУ бол том улс, үүний өнцөг булан бүрт амьдарч буй хүмүүс нь өөр өөр байдаг. Зүүн хойд бүсийн Реднэкууд бол манай сумын залуучуудтай төстэй юм шиг санагдлаа. Илэн далангүй, харилцахад хялбар. Элдэв янзын маяг байхгүй. Бас зочломтгой. Хэл ярианы соёл нь жоохон хэцүү J

Өглөө сэрэхэд зарим нь золбоолог харин ганц хоёр нь хөдөлж чадахааргүй шартсан байв.

rednecks (23

Үглэх хүнгүй, эхнэрүүдээс хол яваа эрчүүдийн үдэшлэг гэж нэг иймэрхүү.

Хаа ч явсан адил.

Цайгаа уугаад, зургаа татуулаад хоёр ахдаа талархсанаа илэрхийлээд дэлхийг бадарчлах замдаа гарах болов. Өөр өөр муж, хотуудаас ирсэн эдгээр хүмүүсийн хэн нь хаа хүрэхийг асууж байгаад баруун зүг рүү явах хоёр залуугийн машинд сууж хөдөллөө.

rd 2 (2)

Америкийн Нэгдсэн Улсын зүүн хойд бүсийн Рэднэкуудтай түр болов нөхөрлөж, тэдний амралт, амьдралын хэв маяг, сэтгэлгээний онцлогийн тухай эхний ойлголттой болсондоо, орчин үеийн зэвсгийн төрлүүдийг туршиж үзсэндээ баяртай байлаа.

Ойн шороон замаасаа гарч, тосгон жижиг суурингуудыг холбосон, сайн чанарын засмал замаар явсаар нэгэн жижиг хотод ирлээ.

-Энэ юу гэдэг хот вэ?

-Ойлсити

-Намайг хотын төвийн аль нэг цайны газар буулгачхаарай?

-Энд буугаад, цааш хаачих вэ?

Чикаго хүртэл замын унаанд  дайгдаж, бага багаар явна даа. Болбол энэ нутгийн “Амиш”-уудтай уулзахыг хичээнэ. Тэгээд гурван өдөрт Чикаго хүрчих байх.

(Амиш гэх хүмүүс нь 17 дугаар зууны Европын амьдралын хэв маяг, хувцаслалтаа хадгалан, орчин үеийн техник технологиос татгалзаж амьдардаг энэ цаг үеийн өвөрмөц хүмүүс юм. Гаднын хүн оруулдаггүй өөрийн тусгай тосгон, орчин, хуультай)

Хотын төвийн нэгэн цайны газар намайг буулгахдаа тэд нэг л итгэлгүй байлаа. -Нээрээ чи эндээс цааш ингээд явчихна гэж үү? Шууд автобусанд суугаад явчихгүй юм уу гэж асуухад, -Үгүй, ингэж явж хүмүүстэй уулзаж, учирч байж би дэлхийн өөр өөр соёл иргэншилтэй танилцаж, тэдгээрийн амьдралын тухай хойч үедээ ном бичин үлдээнэ шүү дээ гэлээ.

Залуус өөрийн зүг рүүгээ явж, би кафендээ ороод нэг кофе захиалж, юу гэдэг газар, юугаараа алдартай нутаг болох талаар асуугаад, хариултыг нь сонсох үед хувь заяандаа дахин итгэлээ.

Америкийн төдийгүй, Дэлхийн түүхэн дэх анхны газрын тосны хотын төвд Тэнгэрийн залсан замаар хүрсэн байв.

Интернетэд орж, Америкийн өнцөг булан бүрийг холбосон Монголын холын замын тээвэрчдийн сүлжээ рүү хүсэлт гаргаж, энэ хавиас намайг замаараа авч, Чикаго руу дөхүүлэх боломжтой, хамгийн ойрын том оврын ачааны тэрэг хаагуур хэдийд өнгөрөх тухай мэдээлэл авлаа.

Эцэс төгсгөлгүй зам үргэлжилсээр.

Монгол Бадарчингаа Америкийн алс хязгааруудад хүргэдэг Монгол тээвэрчдэдээ баярлалаа.

Үргэлжлэл бий.

Явсан хүнээс үг сонс 2

Үргэлжилэл бий.

Эцэс төгсгөлгүй зам үргэлжилсээр.

Sorry, no comments yet.

Write Your Comment

Comment Guidelines: Basic XHTML is allowed (a href, strong, em, code). All line breaks and paragraphs will be generated automatically.

You should have a name, right? 
Your email address, I promised I won't tell it to anyone. 
If you have a web site or blog, you can type the URL right here. 
This is where you type your comments. 
Remember my information for the next time I visit.