IMG_1552

2008 оны 08 сарын 25

Монгол Бадарчин 1-р аян. 47 дахь төр.

Мавританий нийслэл Ноакшот хотоос 130 км-ийн зайд. Баруун Сахара цөл, Африк тив. Ислам шашинтай араб угсааны хүмүүсийн захирдаг энэ улсад тогтворгүй байдлаас үүдэн, цэргийн төрийн эргэлт гараад хэд хонож байгаа цаг үе.

Өглөө нүдээ нээгээд –Би хаана байна аа? гэдэг нөгөө л асуултаа өөрөөсөө асуулаа.

Замд гараад хоёр жил хагас гаруй болжээ.

Байнгын өөрчлөлтийн нөхцөлд олон өдөр, сар, жил байхлаар, орон зай байршил, өдөр хоногоо алдах нь энүүхэнд юм. Бүх байдлыг өглөө бүр өөртөө сануулж байх хэрэгтэй болжээ.

Гэдэс хоржигнож, ам ихэд цангасан байдалтай сэрсэн тул, майхныхаа цахилгаанаа нээж, сандаалиа гадагш шидээд, хоол олж идэхээр гарлаа.mongol badarchin books taivshir

Би хаа байна вэ?

Ямар үзэсгэлэнтэй юм бэ!

Богино өмд, цамцаа тайлахгүй унтдаг болоод удаж байна. Хотын хүмүүсийн хажууд байвал үнэр танар гэж хэцүү л байгаа байх, харин Дэлхийн хамгийн том элсэн цөлд ганцаар байгаа болохоор хамаа алга.

Эмэгтэй хүн багаасаа эмх цэгцтэй байж сурсан болохоор нас ахих тусам улам нарийн зохион байгуултад ордог гэсэн, харин эрчүүд бид цаг хугацаа өнгөрөх тусмаа улам зохион байгуултгүй болох юм.

Хажуунаас анхааруулж, сануулж, халамжилдаг хүнгүй удаан хугацаанд байна гэдэг үнэхээр амаргүй шүү.

Монгол Бадарчин миний хувьд 20 гаруй кг цүнхэндээ майхан, хийлдэг гудас, хоёр ээлжийн хувцас, ганц хоёр эдлэлээ багтаана, өдөр тутмын хязгааргүй замыг туулан амьдрах амаргүй байна. Гэхдээ болж байна.

Хүсэл байхад арга олдоно шүү дээ.

Өглөө босоод юу өмсөх вэ гэсэн асуудалгүй энгийн амьдрал сайхаан.

Майхнаасаа гарах бүрд бүх юм өөр.

Өөр нар, өөр байгаль, өөр өнгө, үнэр.

Харин нэг л зүйл өөрчлөгдөхгүй байна.

Би дахиад л ганцаараа, харь нутагт байна.

Орой нар жаргах үед бүх хүмүүс нь шумууланд хазуулах айдас түгшүүрт автдаг Африкийн урд нутгууд,  ширэнгэн ойт бүсийг амьд мэнд туулсандаа ихэд баяртай байв.

Шавьж нь хүртэл халдвартай, амь насанд аюултай нутгууд дуусч, Өмнөговийн нэгэн сумд, цөлийн гайхамшигт зураглалыг биеэрээ мэдрэн зогсч байнгаа мэт санагдана.

Шинэ улсын, шинэ байгаль орчныг мэдрэх гэж гүнзгий амьсгалахад, агаар өчигдрийнх шиг халуун, цөлийн бүгчим биш.

Сэрүүн салхи сэнгэнсэн – Юу билээ? гэж өөрийн эрхгүй гайхахаар сайхан санагдав.

Элсэн цөлд , шөнө бороо орсон болохоор нэг дор орсон их ус ууршиж амжилгүй, майхны ойр хавьд шалбааг шиг тогтсон байна.

Агуу Сахаарын цөл бороогоо хайрласанд би их баяртай байлаа.

Ховор, бараг байхгүй үзэгдэл шүү дээ.

Өчигдөр Тержит гэх цөл дундын тосгоноос, далайн эргийн, Мавритани улсын нийслэл Ноакшот явах замдаа их оройтож, замын унаа хамгийн сүүлд дөхүүлсэн газраас хэсэг алхаад, майхнаа зоож, ганцаараа амарсан нь энэ.

Арван хэдэн хоногийн  өмнө Мавритани улсын батлан хамгаалах салбарын, хэсэг өндөр цолтой албан хаагчид цэргийн төрийн эргэлт хийж, “ардчилсан” гэх нэртэй сонгуулиар сонгогдсон Ерөнхийлөгчөө “эх орноосоо урвасан” ялаар баривчилж, онцгой байдал зарласан байгаа энэ үед нөхцөл байдал аюултай байна. Цэрэг, зэвсэг техникийн хүчээр эсэргүүцлийн дуу хоолойг хатуу хянасан түүхэн цаг үетэй нь таарлаа.

Өөр өөр шашин, үүсэл гаралтай, боолчлолын далд нийгэм энэ цаг үе хүртэл оршин тогтнодог улсад өндөржүүлсэн болгоомжтой байх хэрэгтэйг мартаж болохгүй.

Үүнээс ч долоон дор хүнд нөхцөлтэй хэд хэдэн улсуудыг ганцаар туулсан болохоор, нөхцөл байдлыг мэдрэх туршлага надад байна.

Өдөр бүр шахуу  504 удаа хөлөөрөө хийлж, өглөө бүр эргүүлэн эвхэж багладаг, хийлдэг гудсаа цүнхэндээ хийж байхдаа, элсэн цөлд орсон борооны чийгийг мэдэрч, Эх орныхоо байгалийн сайхныг санан бодлоо.

Гэртээ харих юм сан…

Майхнаа хурааж, цүнхнийхээ хажуугаар тогтоож, бусад зүйлсээ бас цүнхэндээ хийж баглаад, явах үед холгүй харагдах нэгэн айлаас, төмөр сервиз дээр мавритан цай, цөцгийтэй талх барьсан жоохон охин ирлээ.

IMG_1553

Өлөн гэдсээ баярлуулаад, хоосон савыг нь буцаахгүй гэж бодсон ч, цүнхэнд юу ч байсангүй. Олон жил замд бадарчилж яваа хүнд юу л байхав дээ… Талархал илэрхийлээд, хүүхдийг буцаалаа.

Мавритан, Араб хүмүүсийн чанадаг цайны амтыг нутгийхандаа амсуулах юм сан.

Ядаргаа, өлсгөлөнг шууд дардаг тийм сайхан цай.

Талх барьж байгаа нь ч гэсэн өвөрмөц, маш амттай.

Энэ хорвоод, үүсэл гарал, шашин шүтлэг, мэргэжил боловсролоос үл хамааран, сайн хүмүүс гэдэг ойлголт байх юм аа гэж бодлоо.

Хол замыг, удаан хугацаанд туулж байгаа хүнд, улс бүрийн нийтийн тээврийн сүлжээний цагийн хуваарь маш тохиромжгүй байдаг тул зам дээр гарч, унаанд дайгдахаар гараа өргөөд зогслоо.

Хэд хоногийн өмнө Мароккийн вант улс (манайхаар Хаант улс) виз татгалзаж, хажуух Алжир улсад зэвсэгт босогчдын асуудал хурцадсан тул Испаний Вант улсын, Шенгений бүсэд зорчиж болох виз авахаар тус улсын элчин сайдын яаманд паспортоо өгсөн юм.

Биедээ ямарч бичиг баримтгүй, цүнхэндээ бамбарууш найзтайгаа, хэн болох нь тодорхойгүй хүн, хэлийг нь огт мэдэхгүй, англиар ярьдаггүй улсын цөлийг туулах ямар байсан бэ? гэж хэн нэгэн дараа асуух юм бол.

Цэргүүдэд баривчлагдаж, тосгоны цагдаагийн хэсэг дээр саатуулагдахдаа, кабель телевизийн өнгөт кинонуудыг нь шөнөжингөө үзэж, өглөө цай хоолоор дайлуулаад гарсан гэж ярина даа.

Монгол хүний эвийг олох ухааны нууц.

IMG_1554

Таашгүй нөхцөл байдал бүрэлдсэн энэ улсад, иргэдийн эсэргүүцэл хүндрэх юм бол хөрш улс Мароккогийн визийг Атлантын далайд байрладаг, Испаний Канарын гэх арлуудаас аваад, Мароккогийн Вант улсад зочилно гэсэн төлөвлөгөө боловсруулав.

Испаний ЭСЯ миний паспорт, бичиг баримтыг хүлээн аваад долоо хоногийн дараа ир гэсэн тул ийнхүү, бичиг баримтгүй, буу барьсан хэнд ч болов саатуулагдаж, хоригдох аюултай, онцгой байдал зарласан улсад, зардал мөнгөө хотын буудалд хоосон зарахгүй гээд хөдөөгийн сумыг нь үзчихээд буцаж ирж байгаа нь энэ юм.

Сахарын цөлийн гүнд байрлах Чингэтти гэдэг сууринд хүрээд, Сиерра Леон дахь манай энхийг сахиулагчид надад өгсөн борцоо цүнхнээсээ гаргаж, шөлтэй хоол хийж идэх гэтэл, хотод бууж байсан буудлынхаа гал тогоонд нь мартсана санаад, яаран эргэж явж байна.

Мянга мянган км, тив тивээр яригдаж байгаа миний хол замд, зочид буудалдаа мартсан ууттай борцоо эргэж авах гэж 500 км туулах бол юу ч биш юм. Паспорт, виз гэх албан ёсны бичиг баримтгүй Монгол залуу нийслэлээс нь 130 км орчим зайнд, элсэн цөлд гав ганцаараа хонов.

Хагас кг хатаасан махны төлөө олон зуун км замыг хоёр өдрийн турш туулдаг өөр үндэстэн энэ хорвоод байдаг болов уу?

Харь нутагт гэрийг минь санагдуулдаг, алт үнэт эрдэнэсээс үнэтэй аяллын минь ЭМ алга болоогүй л байгаасаа гэж буцаж явахдаа бодож байв.

Дэлхийн янз бүрийн нутгийн, өөр өөр соёл иргэншлүүдийн, өөр өөр аргаар бэлдсэн мах, хоолуудыг нь амталж байсан ч, бидний өдөр тутмын амьдралдаа иддэг нүүдэлчдийн махыг гүйцэх амт хаана ч алга гэдгийг зарламаар санагддаг билээ.

Надад байгаа нэн чухал зүйлсийн дэс дараалалд Бүгд Найрамдах засаглалтай Монгол улсын паспорт, Дэлхийн алс хязгаар нутгуудад мандуулж байгаа Далбаа, Сахиусууд, CD-нүүд дээр хадгалсан XXI зууны Дэлхий Ертөнц, Хүн төрөлхтний фото зургийн архивууд, тэгээд борц юм

Нойргүйдэл, ядаргаа, өлсгөлөн, биений тамир алдалт зэрэгт борц бол хамгийн сайн эм гэдгийг холын зам надад мэдрүүлсээр байгаа.

Өдөр бүр, долоо хоног бүр, сар бүр байрлалаа сольж, шинэ улс, хот, хэл соёлд нэвтэрч, байгалийн өөр өөр хүчнүүдийн дунд, дасан зохицсон, усыг нь уугаад ёсыг нь дагаж буй Монгол залуу 47 дахь улсынхаа нийслэлд, замын унаанд дайгдаж, төвөггүй хүрлээ.

Мавритан улсын нийслэл үер буусан байдалтай угтав.

IMG_1556

Нарны шууд тусгалтай, Сахарын цөлийн бүсэд оршдог хотод ийм их бороо орж, үерлэсэн байхыг харах сонин санагдав. Хүмүүс ч гэсэн гайхна.

Буудаллаж байсан газраа яаран ирээд, үүдний хүнтэй нь мэндийн зөрүүгүй гал тогоонд нь ортол, ширээн дээр ч, хөргөгчинд ч, хаана ч, миний борц байсангүй.

Их гутарч, гүнзгий амьсгаллаа.

Манай Энхийг сахиулагчид Монгол нутгаас минь авчирч, намайг аян замдаа сайн яваарай гэж өгсөн борцыг хариуцлагагүй байдлаасаа болж алдсанаа, сая л нэг ухаарлаа.

Монгол хоолоо идэх боломжгүй дараагийн хол хэцүү зам нүдэнд харагдаж,  гутарсан царайтай нийтийн гал тогооны сандал дээр суутал, үйлчлэгч залуу над дээр ирлээ.

Хатаасан махаа мартсан учир, олон зуун км явж эргэн ирлээ. Харсан хүн байна уу? гэж түүнээс англиар тайлбарлаж асуутал

-Аан тийн, энд хэд хоног байгаад байсан, нээгээд үнэрттэл, маш хурц байхаар нь муудсан юм болов уу гээд гадаа хаясан гэлээ.

Мавританд бидэнтэй адил “Бедуин” гэх нэртэй нүүдэлчид амьдардаг болохоор борцыг бас хоол хүнсэндээ хэрэглэж байхыг амталж үзсэн. Тиймээс энэ залууд юу байдгийг тайлбарлах шаардлагагүй байв. Харин Монгол борц энэ нутгийн хүнд хурц үнэртдэг юм байна гэж мэдэж авлаа.
Гадаа гартал хогийн савны хажууд, нохой миний уутны захаас нь яг мэрж эхэлж байгаатай таарсан тул, айлгүй шууд шүүрэн авч, дээш барилаа.
-Хэзээ хаясан юм?
-Өчигдөр, хаясан. Тийм чухал юм байсан юмуу? Энэ юу юм бэ?
– Борц, Монголын хатаасан мах.
– Аан уучлаарай, би мэдээгүй, хэд хонохоор нь хаясан юм.
Үзүүрээс нь нохой мэрсэн ортой, баг зэрэг бороонд норсон ууттай борцоо гадаа дэлгэж хатаахдаа, нэг хэсэг тайвширлаа.

IMG_1558

Хагас урагдсан уутруу санаа алдан харж суугаа намайг харсан норвег, франц, марокко болон мавритан залуус

– Юу болсон бэ? энэ юу юм бэ? гээд асууж гарлаа.
– Хатаасан мах гэхэд нэг нь бусаддаа – Энэ Монголын хатаасан мах нь юм байна гэж араб болон францаар орчуулж хэлэв.
– Санаа зоволтгүй, бид чамайг хооллоё! гэж нэг аялагч санаачлага гаргах үед, энэ хүмүүс миний нандигнаад байгаа зүйл юу болохыг ойлгохгүйг мэдлээ.

Тэдний нүдэнд – Хөөрхий энэ залуу ихэд өлсөждээ, нохойны хоол булааж байдаг гэж бодсон болов уу.

– Зүгээрээ, борц гэдэг нь Монголын маш чухал уламжлал юм. Хааяа ядрахаараа, өвдөхөөрөө, гэрээ санахаараа ганц хоёр халбагыг усанд хийж буцалгаад  “Шөл” гэх эмийн хүчтэй хоолоо хийдэг юм. Хүнд өгөхөөс ч хармална. Энэ хатаасан “мах”-ыг Монголоос онгоцоор Sierra Leon улсруу авчирсан гэвэл итгэхүү? Монголчууд нүүдэлчин соёлтой улс, нэг үхрийн бүх махыг сайтар хатаагаад ходоодонд нь багтахаар нунтаглана, аян замдаа авч явдаг юм. Шингэн нь байхгүй ч, бүх амин дэм нь үлдсэн хатаасан махан хүнсийг борц гэж Монголоор дуудна. Энэ борцыг хүртэхээр, хамаг өвчин, уйтгар, гутрал алга болж, хүч тэнхээ ордог юм. Хүн төрөлхтний түүхэн дахь хамгийн хүчирхэг байсан их гүрний цэргүүдийнх нь хэрэглэж ирсэн нууц технолог нь шүү дээ гэж тэдэнд тайлбарлалаа.

IMG_1563

Хэргийн эзэн нохой горьдож хажууд ирэв.

–Сая юу байсан бэ? гэж бидний нууцыг анх удаа амталсан боловч хурдан сэтгэж, идэж амжаагүй хойд Африкийн нохойны өрөвдөлтэй харцанд би ёстой өөдгүй амьтан байлаа…

Халуунаас өөр агаар мэдэхгүй, салхи сэнгэнсэн хээр талаар гүйж үзээгүй халуун Африкийн хамгийн халуун бүсэд төрж өссөн нохойг хараад өрөвдлөө.

-Чи миний маш чухал зүйлд хүрсэн байна штээ! гэж түүнийг загнах гээд болилоо, заа за, нохой юугаа мэдэх вээ, харин үлдээсэнд баярлаа! гээд иллээ. Нохой хажууд илүүлж сууж байгаад унтав.

-Чи үүнийгээ мартсан гээд ирж очихын 800 гаад км газрыг туулаад ирж байгаа юмуу?
– Монголчууд бид өвөрмөц заншилтай хүмүүс, өөрийнхөө уламжлалаа тэгэж л хүндэлж, хайрладаг юм. Нааш явж байх хугацаандаа борцыг идсэн эсвэл хаясан байвал яанаа гэсэн бодол өдөр шөнөгүй толгойноос гарахгүй байсан. Энэ миний 2 сард идэх байсан хэмжээ, гэж нохой идсэн хэсгийг цэвэрлэж байхдаа хэллээ.

Гэрээсээ гараад, Европ, Ази, Араб, Африкийн 48 орноор 3 жил гаруй аялахад, нутгийн юм бүхэн ямар үнэ цэнтэй болохыг ухаарах юм.

Жаахан ч гэсэн борцоо олж авсандаа маш их баяртай байлаа.

Орой Монгол шөл хийж, хөлсөө гартал иднэ гэж бодохоор үнэхээр сайхан.

Монгол мах, Монгол борцны амтыг, махаа угааж хэрэглэдэг үндэстнүүд, эсвэл ферм гэх хашааны аргаар үржүүлсэн тэжээмэл малын махаар хооллодог хүмүүс мэдэрч үзээгүй, төсөөлөх ч гүй биз.

Хэзээ ч жинхэнэ мах идэж үзээгүй хүн зөндөө.

Зэрлэг байгалийн цэцэг ногооны үнэр амт нь махандаа шингэсэн байдаг, элдэв өөр хоолны амтлагчгүй, амтлагч шаардлагагүй шахуу хоолтой цорын ганц Үндэстэн бид байж магадгүй.

Дэлхийн хамгийн эрс тэс уур амьсгалтай улсын, эзгүй хээр талаар эрх чөлөөтэй бэлчин, таалагдсан цэцэгс ногоогоороо хооллоно, араатан чоно, эрс тэс цаг агаарын хүчнүүдийг давж чаддаг,  өнөөг хүртэл үржин амьдарч  байгаа малын мах гэдэг бол хаана ч байхгүй өвөрмөц, эрүүл хүнс юм байна гэдгийг холын аялал надад ойлгууллаа.

Шөл хийж идээд, нутгаа бодож суух үнэхээр сайхан.

Европ тивийн Парис хүртэл хүч тэнхээ сэлбэхээр борцоо хараад инээд алдав.
Өмнөд Африкт учирсан Монголчууд байсан борцоо надад өгөхөд, бас  авмааргүй санагдсан. Тэд надтай адил хүний нутагт удаан амьдарч, хэдэн жилд ганц хариад, авчирсан борцыг нь аваад явах муухай л байсан. Гэхдээ Монголын далбаатай хол замыг туулж байгаа болохоор надад өгсөнд би их баярлаж билээ.

-Хэрэггүй ээ! гээд байхад надад -Сайн яваарай гээд өгсөн тэр борц, хүний нутагт хоол болж, аминд ч орж байсан юм.

Борцоо цүнхлээд – Одоо яах вэ ? гэдэг дараагийн асуулт толгойд орж ирлээ.

Испаний Элчин сайдын яам руу, виз, паспортоо авахаар нөгөөдөр очино, борцоо эргэж авахаар, төлөвлөсөн өдрөөсөө 2 хоногийн өмнө нийслэлд нь ирсэн болохоор, яаж ч байсан интернэт үйлчилгээний газар орж, Монголын мэдээ мэдээлэл, олон улсын харилцааны байдлыг олж мэдэхээр гарлаа.

Өмнө нь хэд хэдэн удаа үйлчлүүлж байсан, интернэт үйлчилгээний газар ортол.

IMG_1559

– Хөөе Монголоо? Танайх Олимпод алт авсан гэлээ.

Монгол эр хүн уйлдаггүй ч, цээжний хөндийн гүнээс нүдний доод зовхи руу нулимас түрдэг тэр зүйлийг мэдэрлээ.

Хашгирмаар санагдсан ч, харь нутагт төв байдалтай байх ёстойгоо санаад, гараа атган- “Еэа” (энэ цагийн баяраа илэрхийлэх дэлхийн авиа) гэж дуу алдлаа.

Би очсон газар бүртээ, өөрийгөө Монгол гэж нэг ч болов хүнд хэлж, ойлгуулж, цээжлүүлэхийг хичээдэг бөгөөд олон янзын улс үндэстний хүмүүс орж гардаг интернэтийн газрынхан миний Эх орны нэрийг цээжилсэн нь сайхан байв.
-Хаана байдаг юм? гэж анх асууж байсан залуус, эх оронд минь болж буй энэ цагийн хамгийн том баярт үйл явдлыг хэлсэнд ихэд баярлалаа.

Мэдээний вэбүүдийг нэгэн доор нээгээд нүднээс нулимс гарах шахлаа. 7 тэрбум хүн амтай Дэлхийн энх тайвны арга хэмжээнд, Монгол гэдэг Эзэн Хааны улс, нэрээ цуурайтуулж, Далбаагаа мандуулжээ.

Монголын залуус дэлхийн хэмжээний том спортын арга хэмжээнд Эх орныхоо нэрийг өндөрт өргөж байгаад би маш их баярлаж байлаа.

Нутгийн хүмүүс ч гэсэн, намайг шагнал авсан юм шиг хүндэлж байгаа нь харагдаж байв.

Олимпийн алт гэж ямар том зүйл вэ.

Алт, мөнгөн медалууд авсан мэдээг уншаад нулимс гарч эхэллээ.

Дэлхийг тойрч, үзэж судлах аяллын дөрөвдүгээр  нулимс энэ байв.
-Яагаад би уйлахаасаа ичих ёстой гэж, яагаад би сэтгэлээ барих ёстой билээ гэж бодоод, хоёр гараа дээш өргөөд ура! гэж ганцаар хашгирч эхэллээ.
Интэрнэтэд байсан хүмүүс Олимпийн шагнал аваад байдаггүй улсын иргэд болохоор миний баярыг ойлгож, дэмжин, хамтдаа баярлав.

– Та нар юу уух вэ?
-Зүгээрээ, бид чамд юм авч өгье, баяр хүргье.
– Үгүй, би та нарт юм авч өгмөөр байна гэж хэлээд гарж дэлгүүрээс кола ундаа, печень зэргийг авч дайллаа.

Мавритан улс согу /согтууруулах ундаа/ худалдаалахыг хориглодог тул пиво надад зэрэглээ төдий л харагдлаа.

Мавритан нь Монголтой адил 3 сая хүн амтай улс. Төлөөлөгчдөө Олимпийн наадамд  явуулсан ч, эх оронд нь болсон цэргийн, төрийн эргэлт, тэдний амжилтанд сайнаар нөлөөлөөгүй л болов уу.

Өмнөх улс, Сенегалд Олимпийн нээлт үзэж байхдаа зэвсэгт төрийн эргэлт нэг өдрийн өмнө болсон Мавританы багийг хараад өрөвдөж билээ.

Олимпод өөрийн далбаагаа мандуулна гэж мөрөөдсөн залуусын эх оронд нь төрийн зэвсэгт эргэлт болсныг сонсоод ямар байсан болоо.

2008 оны Олимпийн үеэр нийслэлийг нь бөмбөгдөж эхэлснийг сонссон Гүржийн тамирчдад бас хэцүү байсан байхдаа.

Эх орондоо байсан бол, найзуудтайгаа баяраа тэмдэглэж, хөөрөөд сууж байх сан даа гэсэн бодол ганцаардлын ертөнцөд буй надад бодогдлоо.

Гадны том том улс гүрний нөлөө, байгалийн баялгийг минь цөлмөж авахаар ирсэн үндэстэн дамнасан корпорациудын захиалгаар болсон, 7 сарын 1-ний явдлын дараа сонссон анхны сайн мэдээ энэ.

-Монголчууд ямар их баяртай байгааг хүмүүсийн интернэт дахь зургууд, сэтгэгдлүүдийг хараад ойлголоо.

Манай найзууд эхний алтан медалийн үеийн гэр паари-ны зургуудаа явуулахад үнэхээр атаархал төрж байв. Монгол улсынхаа далбаагаа бүгд өндөрт мандуулсан байна. Тэд өөрсдөө алт авсан юм шиг баярлаж байгаа нь зурган дээрх агшингуудаас харагдаж байв.

Өнөө орой хэнтэй, хаана баяраа тэмдэглэх вэ?

Дахиад л ганцаараа…

Борцоо мартсан нь, яаралтай эргэн ирж, Монголчуудтайгаа интернэтээр хамт баяраа тэмдэгэл гэсэн зам байж дээ гэж бодлоо. Ялангуяа цөлд хоноход орсон бороо, Мавританы нийслэл, элсэн цөлийн Ноакшот хотод тогтсон усны үер бас л дохио юм болов уу гэж санагдав.

Байгаль Дэлхийгээ шүтэн ирсэн хамгийн эртний хүн дүрстний угсаа.

Бүгд Найрамдах засаглалтай Ардчилсан Монгол улсын анхны алт.

Дэлхийн олон тэрбум хүнд улсаа таниулсан гавьяа.

Altan medal

Монголын тамирчид Олимпид маш амжилттай оролцож 2 алт, 2 мөнгө авчирсанд хувиасаа баярлаж талархаж буйгаа энэ холоос илэрхийлье!

Түвшинбаяр, Бадар-Ууган, Гүндэгмаа, Сэрдамба та нар Монголчуудад итгэл, Энх Тайвныг авчирсан шүү!  гэж хэлмээр байна.

Эдгээр залуусыг бэлдсэн манай багийн ахлагч, дасгалжуулагчиддаа бас баяр хүргэж, ихэд талархснаа хувиасаа илэрхийлмээр байна.

Бид хүсээд хичээвэл чадна шүү! гэдгийг манай залуус дахин харууллаа.

Баярлалаа!

Үргэлжлэл бий…

Явсан хүнээс үг сонс 2

Явсан хүнээс үг сонс 2

Horaayy..there are 20 comment(s) for me so far ;)

#1

Баярын мэнд хүргэе анд минь. Яваад байгаарай.

3apaa wrote on 2008/08/25 - 23:38
#2

За амжилт хүсье андаа. Монголчууд 4 алттай тэнцэх 2 алт 2 мөнгө авлаа шүү дээ. Эх орныхоо төлөө цохилох зүрхийг чинь хүндэлье

Org wrote on 2008/08/25 - 23:55
#3

Bayar hurgie chinii aylald Mongolchuudiin maani alt mongo absan amjilt demjleg ogno gedegt itgej baina Mongol uls mandan badarnaaaaaaaaaaaa Mandan badarch ekhellee. Uuuuuuhai Uuuuuuuuuuuuukhai Uuuuuuuukhai

budaa wrote on 2008/08/26 - 08:33
#4

Tanii ayalsan oron bur chine, hariin orond amisgalsan moch bur chine mongol ahan duusiinhee toloo mongoliinhoo toloo baisand chine bayarlalaa. Beejingiin olympiin altan medeluud mongoliin ev negdel baharhal husel zorigiig badraasan uneheer saihan zuil baisan.Tanii aylald chin setgeleesee amjilt husie

bayarbat wrote on 2008/08/26 - 10:30
#5

amai uruunusu yavah bolgondo martsan ym bii esehig shalgaj bai l da.chi teged dahiad 4jil aylah ymu.yamar urt hugatsaa ve,sanhuuge yaj shiidej bgan?
eej aavig chin uruvduj bn da.ted avsan tsalinga bugdig n chamru yavuldag baih da.danda iim baidlar yavj bolohgui bhaa.ayan zam chin ulziitei baih boltugai

buya wrote on 2008/08/26 - 12:34
#6

hey naiz mini chamd amjilt husii!!! Mongol tumeniig bayarluulsan ter 4-n zaluu avsan medalia bugd mongolchuuddaa zoriulsan!!! gehdee chamaig medej bgaa bol ter zaluus bugd duu negteigeer chamd zoriulah baisan baihaa!! yagaad gevel chi ter zaluusiin adil Mongol zaluusiin shildeg ni shuu dee!!! buu shantraarai!!! chi Mongol tumnii baharhal shuu!!! uuniig unshij bui buh humuus Amaidaa 10$ ogii!! Amaigaa demjii zaluusaa

ayush wrote on 2008/08/26 - 13:54
#7

Bas chamd helehed manai Badar-Uuganatai hamt Mauretiin zaluu hurel medali avsansh dee.Za Amjiltene manai 4 medali chamd ih erch huc nemsen baihaa.Saihan baisan shuu!

bi wrote on 2008/08/26 - 15:18
#8

Залуу минь , чамд бас алт, мөнгөн медалийн баяр хүргэе. Бид бүгдийн алт, мөнгө шүү. Бичлэгийг чинь байнга уншдаг, чи тэр 4 залуугаас огт дутахгүй үйлс бүтээж байгаагаа мэдэх үү, чамаар бахархдаг, бид чамтай хамт аялж байгаа шүү. Болгоомжтой яваарай, анд минь

ganbat wrote on 2008/08/26 - 16:03
#9

SAIN UU AMAI . ENE SAIHAN MEDALUUDIIN TSAANA N BGAA DASGALJUULAGCH NARIIN GAVYAA AGUU SHVV TE…MINII MEDEHEEER judogiin dasgaljuulagchaar n Nasantogtoh . Boldbaatar 2uulaa MUGT, boxoor Batsvren, Bandi buudlagaar Undralbat/buudlagiin dasgaljuulagchaar OHU-d togsson gene lee/ IIM SAIN DASGALJUULAGCH NARIIN BUYANAAR MONGOL TVMEN MONGOL TSOS ZVRHEEREE BAHARHAJ OGSHIJ BARDAMNAJ BAYARLASAN ODRVVD BAILAA SAYIIN HED HONOG….ZA AMAI MIN URAGSHAA CHINII TOLOO VRGELJ SAIHAN BVHNIIHEE ERUULIIG ORGOJ BAIDAG SHVV

BATAANAA wrote on 2008/08/26 - 17:05
#10

Hehe goyo temdeglel bna aa.KK za good luck Amai ah aa.

Oojiinoo wrote on 2008/08/26 - 19:41
#11

Box-iin dasgaljuulagch Bandi, Buudlagiin coach UndralBat, Judo-iin dasgaljuulagchtai mash ih bayrlallaa Mongolchuud evtei baihdaa huchtei Tamiin togoonii ulgereer amidrahaa boliy bie beinee demjiey

Bat wrote on 2008/08/27 - 00:24
#12

Mongol hun olimpoos Alt avahiig harah uneheer saihan bas uilahgui baihiin argagui yum bilee. Gertee baihad iim baigaa yum chin hunii nutagt yavahad yamar baih n oilgomjtoi. Za tegeed chamd ch gesen amjilt husii chi ch bas uneheer saihan uil buteej yavaa zorigt Mongol er shuu. Spainii visa butehiin tuluu zalbirch bn. Burhan chamtai hamt baih boltugai.

Tulga wrote on 2008/08/27 - 15:34
#13

ene medee chamd huch chadal ogson gej naiday, yavaad baigaarai

bortstoi budaatai shol ch bas yanztai shu te, manaihanii neg paketalsan butaatai shol geed zardag da, ter ch bas dajgui shu

Alchemist wrote on 2008/08/27 - 19:11
#14

Tanii bichsen zuiliig unshaad uilah shahlaa. za ter ch yahav. Tand amjilt husie!!!

MONGOL

TUvshee wrote on 2008/09/04 - 15:35
#15

Best wishes for you!!!

TUvshee wrote on 2008/09/04 - 15:36
#16

hi. Manai gadaad naizuud ch gesen MGL 2 alttai geed l nad luu message bichhed bas l gogo l sanagdaj bailaa. Za tged amjilt huseye! tsaashaa zutgeed baidag yum shuu!!!

oonoo wrote on 2008/09/04 - 22:18
#17

amai ah aa bayarlalaaa ene zaluus tai ta ch bas adihan mongoliin neriig mongoliin soyoliig mongol gedeg ulsiig delhiid taniulj bishruulj baigaa aguu humuus shuu negdugeert Chingis haan daraa ni olimpiin tamirchid bas ta nar orno shuu ta nar tiim aguu humuus shuu amai amai amjilt amjilt bolgoomjtoi yavaarai burhan taniig taniizam harguig tanii husel zorig amjiltiig iveej eh orond mine avchiruulaarai.bayarlalaaa

magnai wrote on 2008/09/08 - 23:20
#18

klhdsnv wesmrc sknhp zuato bjsgnotp xlhgyqo igenvjlbo

tkwdp gzdtsk wrote on 2009/04/15 - 14:38
#19

dongoj boxoor manaixan 1alt 1mongo ixrel avlaa shyydee yrai

enkh wrote on 2009/09/12 - 22:59
#20

tiim ee ta chadsan tsaashid hicheegeerei

Naumi wrote on 2011/05/04 - 20:17
You can leave a response, or trackback from your own site.

Write Your Comment

Comment Guidelines: Basic XHTML is allowed (a href, strong, em, code). All line breaks and paragraphs will be generated automatically.

You should have a name, right? 
Your email address, I promised I won't tell it to anyone. 
If you have a web site or blog, you can type the URL right here. 
This is where you type your comments. 
Remember my information for the next time I visit.